藝人施明上月離世，觸發李泳漢和李泳豪兩兄弟之間的恩怨情仇！李泳豪指兄長以法律手段，令他超過一年未能跟母親見面，想搵對方都要用「無來電顯示」電話方能聯絡；李泳漢則拿出證據，反擊「失聯」指控，並大爆「禁見」真相，指父親李家鼎去年曾受驚求救，並指李泳豪要分身家，泳漢擔心母親安全，才採取保護之法。

施明上月因肺炎不幸辭世，長子李泳漢正為亡母籌辦喪禮細節，為了讓母親可以安息，日前他公開表態已邀請斷聯已久的弟弟李泳豪出席喪禮，唯獨點名不歡迎李泳豪的台灣太太Agnes踏入靈堂，因母親沒有承認過對方是新抱。前日事件繼續發酵，李泳豪接受傳媒訪問，指被禁見母親施明超過一年，他曾為此事報案，但因李泳漢行使監護令，令他無法與母親見面，除此之外，李泳豪還表示遭兄長踢出家族群組，電話亦遭封鎖，連日來主動打給兄長追問喪禮事宜，亦是用了無法識別的電話才打得通，但至今仍不知道母親施明的出殯日期及地點，對於李泳漢指他的太太Agnes不能到靈堂，李泳豪則堅持態度：「我會同太太一齊出席。」

兩人的父親李家鼎（鼎爺）則站在李泳豪一方，贊同Agnes可以出席喪禮，並跟李泳豪口徑一致，向傳媒爆出施明患病期間不獲探視權，揚言「都唔知邊個房邊個Number點探」，暗指李泳漢收埋施明，令他與李泳豪夫婦都無法探望。

李泳漢前晚接受本報獨家專訪，對於李泳豪稱要用無法識別的電話，才「成功」聯絡到他時，李泳漢直斥荒謬：「我從來冇拉黑過佢，係佢2021年將我所有嘢Block晒，如果我Block咗佢，佢嗰日根本冇可能打到畀我。」李泳漢為證清白，出示了4月2日李泳豪打給他的電話紀錄，上面清楚顯示李泳豪是用自己手提電話打給他，而非李泳豪口中的無法識別電話號碼。李泳漢續稱，兩人通電話時亦已表明確實日期一定會通知，不明白對方何解又要拿出來大做文章。

提到李家鼎、李泳豪向傳媒爆出施明患病期間不獲探視權，李泳漢忍不住大爆原因：「其實呢啲家事我真係唔想講，但唔講又會畀人再扭曲事實，根本就冇收埋唔畀見呢回事，由2022年至2023年我阿媽住院期間，鼎爺同李泳豪都多次嚟過探我阿媽，就算2024年我阿媽情況危急，佢哋都有嚟探，後來平安出咗院返屋企休養，我阿媽話唔想佢老婆嚟屋企，結果之後李泳豪就冇探過我阿媽，最後一次應該2024年聖誕節左右。」

李泳漢直指從來沒有不准他們來探望母親，只是去年7月左右，因為當時發生了一件「驚天動地」的事，為了保護母親才有所防範。他說：「大約6、7月左右，有一日突然收到鼎爺打電話嚟求救，佢當時表現得好驚，話畀李泳豪兩公婆監控，出街都要佢哋批准，又話李泳豪要『分身家』，最後鼎爺畀咗成300萬佢哋……點知畀完錢第二日，李家鼎就好急咁打嚟，問施明住喺邊間房，話李泳豪兩公婆想探佢，我梗係驚啦，睇到鼎爺咁嘅情況，我點知會發生咩事，為咗保護我阿媽我當然話唔得，之後李家鼎表明要幫佢兩公婆影施明一張相，有次佢仲緊張到喺深切治療部大吵大鬧，同人講佢係施明老公，叫人開門，搞到醫院打畀我。有次又突然衝上我屋企拍門，話要入嚟影阿媽張相，又話係豪仔叫嘅。」

問到李家鼎為何如此害怕李泳豪夫婦時，李泳漢亦覺得難以解釋，指鼎爺甚至連去買餸都要得到李泳豪太太批准，每日都要報告行蹤。李泳漢曾經叫過父親搬去跟他同住，不用一個老人家自己住，但李家鼎一臉有口難言地拒絕，完全令他不明所以。他嘆口氣說：「我見到佢咁都覺得佢好可憐，成日畀人呼呼喝喝，佢每次都表現到好驚，完全唔敢反抗咁，人哋叫佢點做佢就要點做，所以我都預咗佢會出嚟咁講，佢一個人老人家畀人控制成咁，我仲可以點怪佢，亦唔知可以點樣做，我淨係想搞好我阿媽嘅喪禮，守住母親最後嘅尊嚴。」李泳漢強調他有證有據，絕對不怕公開對質。