馬德鐘帶百年紅桃粿模具憶母親傳承潮州情 考慮家鄉開騷 相隔20多年計劃再出歌.馬德鐘（馬神）今日（15日）以宣傳大使身份到上環出席「香港潮州節」記者會，同場仲有劉洋，活動由楊玳詩擔任籌委會主席。馬德鐘透露媽咪係潮州人，更帶咗傳統美食紅桃粿嘅模具到場，話呢個模具媽咪用咗50多年，相信祖先傳落嚟都有近百年歷史，係佢兒時同媽媽一齊整粿嘅回憶。媽咪離世後，佢就一直保存呢個模具。問到係咪擅長潮州話，馬神話父母離開後少聽咗，只識幾句，姊姊同哥哥比較熟悉，今年新年都有返家鄉見識傳統活動。

馬德鐘早前喺廣州舉行音樂會，問到下一站會唔會考慮家鄉，佢笑言係好建議，原先都有構思其他地點，𠵱家會想潮州優先，不過就唔會唱潮州歌，因為覺得好難。至於香港站都有考慮，因為𠵱家場地比較多，唔再限於歌手先可以開騷，加上廣州站後重新聚集咗粉絲，大家都想佢再開騷。問到係咪向音樂方向發展，馬神笑言唔係專注一項，但覺得自己唱歌可以，同時都有傾內地演出工作。最近仲想過出歌，話對上一次出歌已經係20幾年前嘅《衝上雲霄》，當時係因應角色出歌。佢比較鍾意唱慢歌，快歌要跳唱比較難搞。馬神認為出歌唔算難事，最重要係考慮平台同點樣同大家分享。問到想唔想拎音樂獎項，佢笑言有獎都會出席支持。

同場嘅劉洋就話，嚟香港發展後愛上潮州美食，特別係火鍋、滷水同生醃海鮮，因為佢家鄉都靠海，感覺潮州美食有同樣風味。問到想做美食節目，佢話想，仲有同李金凱喺網上平台拍片分享香港地道美食，都想喺內地拍俾各地粉絲睇。講到有份參演嘅《愛·回家之開心速遞》宣告即將完結，劉洋話作為演員好唔捨得，都知道劇集陪咗觀眾近十年，大家都會唔捨得。佢透露「細曹總」仲有一集戲份，會安排角色同觀眾告別，細節未知因為未收到劇本。若果最後一日拍攝，佢會把握時間「集郵」。劉洋話鍾意拍劇，得到前輩指導，問到有冇打聽係咪獲安排參演新劇，佢相信公司有好多計劃，會等公司安排，自己當然想拍。

TVB