古天樂出品頭炮舞台劇《大龍鳳》7月公演 張繼聰首任監製：拍海報已戲癮大發

由古天樂出品「天下一幕」頭炮舞台劇《大龍鳳》，將於7月24日起正式公演。今次改編自龍文康嘅編劇作品，係香港第三度公演嘅全新版本。張繼聰首次擔綱監製，聯同張志敏、郭芙一齊上陣，仲請到曾憑同劇奪得2014年「香港舞台劇獎最佳男主角」嘅朱栢謙主演兼執導，加上新鮮出爐金像獎影后廖子妤特別演出，仲有何嘉莉、吳冰、黃梓僑、徐浩昌（肥腸）、湯君慈、許月湘、趙君瑜、李玗蓁、黃詩詠等一眾演員參演。早前一班演員齊集拍攝海報，劇都未公演，各人已經演技大爆發，令監製阿聰感受到劇力萬鈞嘅魔力。

張繼聰話，今次係第一次接觸舞台劇監製崗位，拍海報時見到班演員戲癮大發：「為咗配合喜劇效果，攝影師要求大家喺表情演繹上要有戲，包括眼神，完全係一次表情大挑戰。但呢班演員完全冇難度，大家冇偶像包袱，唔介意面部表情趣怪扭曲，各施各技完成拍攝。對於我呢個初哥嚟講，猶如打咗支強心針，開咗個好頭。」

廖子妤今次再次飾演媽咪角色，佢話：「聰哥第一次做監製，無理由唔撐阿仔㗎！其實繼3年前參演過《飯戲攻心》後，再有人搵我做舞台劇，好開心又好巧合。上次演舞台劇我啱啱攞完獎，今次又係攞完獎第二日就收到邀請。唔知仲有幾多次機會㗎？邊有咁多獎攞呀！所以每次我都好珍惜。今次劇中我有兩個仔女，仲第一次做外母，同朱栢謙飾演兩公婆，當然要乘機偷師。」

身兼導演同主演嘅朱栢謙已經係第三次演出《大龍鳳》，佢笑話呢個龍文康作品，每次演出都帶俾觀眾唔同驚喜，自己甚至會演到哭笑不得、同哭同笑。問到如果監製阿聰粉墨登場，適合演咩角色？朱栢謙力推阿聰演校長：「聰哥有型得嚟又有幽默感，有急才又夠charm，我簡直比下去。如果佢做老豆角色，我就演佢個仔，真係好期待我哋兩父子會有咩火花。」

久違幕前嘅何嘉莉喺劇中飾演朱栢謙其中一位太太，佢話：「可以同殿堂級嘅朱栢謙合作，好榮幸，我相信佢可以帶動我入戲。我一直都好想演舞台劇，今次終於有機會。拍海報時要表現古惑、戚眉弄眼，表情誇張，已經感受到舞台演出有別於電影同劇集，好新鮮。」阿聰仲溫提佢要把握機會去旅行充電，因為五月就要全情投入排練。

劇中仲起用咗多位年輕演員，包括吳冰、湯君慈、黃梓僑、肥腸等。吳冰笑言知道「老豆」原來係朱栢謙，大感壓力，要打醒十二分精神；湯君慈就話冇諗過拍海報要表情多多，仲要擺出乞求pose，係一次難得嘅舞台初體驗；被阿聰形容為「港版許光漢」嘅黃梓僑笑言不敢當，佢雖然舞台劇經驗唔多，但經常喺網絡頻道拍短片，演技訓練有加；肥腸就時刻提醒自己要早睡早起，以最佳狀態應付每場表演，隨時準備「執生」。