方力申紅館騷老婆抱女撐場 《百分百感覺》陣容世紀合體 鄭中基梁漢文兄弟助陣.方力申一連兩場《Perfect Moment 最佳時間演唱會2026》今晚（15日）喺紅館開鑼，全場八成入座率，多位圈中好友到場支持，包括星島新聞集團主席蔡加讚、陳小春、蘇永康、陳瀅、蔡潔、小肥、莊子璇等。劉德華、張學友、黎明、郭富城、梁詠琪、楊千嬅等更送花籃祝賀。方力申父母、老婆葉萱同囡囡都有現身，囡囡更戴住太陽鏡同耳筒保護聽力，萌爆全場。

方力申以三面台加延伸舞台設計，一出場就同全女班舞蹈員又唱又跳，唱完第一首歌即高呼：「知唔知道我掛住你哋！」佢話入行20幾年恨講「山頂嘅朋友你哋好嗎」呢句好耐，終於圓夢。方力申多謝大家陪佢度過第一晚紅館騷，又笑言收嘅短訊仲多過結婚嗰陣：「身邊好多朋友替我高興，能夠行到呢度真係好感激。」

演唱會嘉賓陣容強勁，除咗曾合作《美女廚房》嘅鄭中基、梁漢文兄弟合體，仲請嚟周麗淇、陳曉東同李彩華三位當年合作《百分百感覺》嘅好友世紀重聚，四人一齊合唱《兩男一女》。方力申話呢首歌喺巡演時粉絲爭住同佢唱，今次係24年後四人首次同台合唱。陳曉東笑言當年拍完劇收工，會用跑車載方力申返屋企，李彩華都爭住話「東東都有載我」。方力申仲幫下月開紅館騷嘅陳曉東宣傳，周麗淇即問東東會唔會請佢做嘉賓，場面搞笑。TVB