方力申紅館騷陳曉東李彩華掀回憶殺 爆唔識做人得罪親戚朋友絕交. 歌手方力申（小方）昨晚（15日）在紅館舉行一連兩場《最佳時間》演唱會，全晚嘉賓陣容強勁。率先登場嘅係《百分百感覺》經典拍檔陳曉東（東東）、李彩華（Rain）等人，四人合唱《兩男一女》，回憶返晒嚟！小方爆當年拍劇時自己仲係大學生，收工後獲東東用法拉利接送，Rain即笑言東東都有車過佢。東東笑指小方當年演戲表情浮誇，似足演繹漫畫角色。梁漢文（Edmond）亦罕有現身，同小方合唱《龍咁威》及《美女廚房》串燒歌，全場high爆。

小方身為前港隊泳手，喺設計成泳池嘅舞台上唱《繼續游》。佢自爆1999年曾參加紅館舉辦嘅世界游泳錦標賽，今次係首次以歌手身份踏足紅館，仲係全家動員撐場。見到成長片段，小方感觸話：「做爸爸之後，見我爸爸影我個女，呢廿幾年都冇見過佢咁開心，好開心佢可以享兒孫福。」

為演唱會努力操肌嘅小方，跳唱新歌《万刀甲》時更索性剝背心赤膊上陣，大騷胸肌腹肌。健身教練杜德智打鼓助陣，大讚小方四星期將體脂由16%減到8%，全無怨言。小方又話藝人係佢第一份工，過去唔識做人，試過得罪親戚、廿年冇偈傾，又試過同朋友絕交。而家佢覺得最緊要「老闆」——老竇、老婆、女兒滿意，就係成功同開心。encore環節小方同歌迷打成一片，遞咪合唱《自欺欺人》、《隨傳隨到》等，氣氛推向高峰。