倪嘉雯可塑性高 百變造型率先睇. 無綫全新靈異輕喜劇《香港探秘地圖》於18號晚首播，故事圍繞7大香港都市傳說為藍本，包括大學校園傳說、片場靈異故事、華富邨UFO、結界之謎等。劇情講述為人極度科學頭腦、擅長邏輯思維嘅女主角畢萍（龔嘉欣飾），透過深入探討及揭秘各式各樣嘅都市傳說，誓要揭開風水大師莊一臣（黎耀祥飾）神棍真面目。除視帝視后，三大潛力小生及小花——飾演「渴望見鬼導演仔」高文彬嘅丁子朗、飾演「極恨脫單戀愛腦美少女」王秀儀嘅倪嘉雯（Carmen），以及畢萍弟弟畢鳴嘅孔德賢——喺劇中佔戲極重，當中尤以迷信到極點嘅Carmen最為搶焦。Carmen喺劇中係A0，為咗成功脫單無所不用其極，加上為人神經質、容易反應過大，經常令身邊人摸不著頭腦，相當搞笑，絕對係劇集嘅「搞笑擔當」。

另外，Carmen喺劇中嘅造型亦相當吸睛，除咗主打可愛「馬尾鬢辮」少女造型，根據官方發布嘅劇照搶先睇，佢喺劇中將破天荒地反串演「鬍鬚仔」，單係反串造型已令人笑破肚皮。丁丁同Carmen喺劇中有極大恩怨，丁丁更加係Carmen A0背後真正罪魁禍首，Danny同Carmen則因為美麗嘅謊言「不打不相識」。TVB