「TVB新駙馬」容天佑升呢做爸爸 億萬千金老婆誕7.7磅巨B女.30歲無綫小生容天佑（Alex）正式做爸爸！憑《法言人》「Tony仔」一角成功入屋嘅佢，日前喺社交平台報喜，太太扶天恩（Winnie）順利誕下重3.5公斤（約7.7磅）嘅健康巨B女，一家三口已出院返歸，展開新生活。

容天佑透露，囡囡出世當日佢仲要開工，好彩阿女好錫佢，等到凌晨4點半收工先收到老婆電話，隨即化身「柴可夫」送太太入院。佢感恩女兒等佢收工先「作動」，加上醫生高超手藝，太太只用咗三個半鐘就順產。相中所見，Winnie產後精神奕奕，入住嘅私家單人房相當寬敞舒適。

容天佑同圈外女友Winnie拍拖8年，女方家族經營珠寶首飾批發生意，家世顯赫。兩人去年11月結婚，當時過大禮金器排場十足，容天佑更被封「TVB新駙馬」。新婚不久即造人成功，如今組織三人家庭，大批圈中好友同網民紛紛送上祝福。TVB