岑麗香靠鬧仔演活霸氣Madam 飾演苗僑偉下屬有三嫂靚湯飲. 岑麗香近日接受薛家燕、思敏及范振鋒主持嘅《開心大派對》錄音訪問，大談相隔數年回巢拍攝新劇《重案解密》嘅感受，仲分享咗獨有嘅育兒法，被主持笑係「Madam式育兒」。香香透露今次角色同以往截然不同，唔再係被人保護嘅柔弱女子，而係要查案、有氣勢嘅女警。佢話接到角色時既興奮又緊張：「好少人會畀岑麗香一個咁嘅角色，通常搵我都係一個被保護嘅女仔，我要喊，然後畀人救。」

為咗演好Madam，香香特意向真正嘅重案組女警請教，對方一句話令佢恍然大悟：「佢同我講咗一句，其實你都係媽咪，同鬧仔嘅語氣係一樣。」香香笑言原來平日管教囝囝嘅語氣，就係演繹女警權威感嘅秘訣，仲搞笑多謝兩個仔：「多謝你激我。」香香又自爆拍攝期間過度投入角色，曾同老公去睇演唱會時滿腦子都係案情，即場同老公分析，搞到老公瞪大眼望住佢，擔心佢太過入戲。

對於今次能夠同苗僑偉（三哥）合作，仲喺劇中飾演三哥嘅下屬，香香興奮話：「我覺得好有緣，好開心，終於等到喇！仲有，同三哥拍劇有好多嘢食，因為三嫂，仲有湯飲，所以真係好幸福。」家燕姐大讚香香外表溫柔，問佢現實中係咪從不責罵分別7歲同5歲嘅囝囝？香香自爆有一套「警告式」育兒法：「我會警告佢，畀佢幾個機會，講咗三四次之後，你都仲未做，我就開始會大聲啲，佢哋就會知道。」主持人笑言係「Madam式育兒」，香香都笑住認同。