鄧麗欣兩畫作被質疑抄襲 網民：係咪玩找不同之處？. 鄧麗欣（Stephy）近日參與第13屆香港冉起當代展覽，展出15幅畫作並公開發售，收益全數撥捐香港癌症基金會。佢分享創作意念話：「作品中豐富嘅色彩變化承載住情感，喜悅、緊張、寧靜與共鳴，每幅畫都有屬於自己嘅溫度；當佢哋聚集埋一齊，就形成一種共同嘅脈動，一次集體嘅呼吸，邀請觀者喺面對作品時看到自己、看到天地、看到眾生。」Stephy話呢批畫作由構思到落筆，合共用咗兩個幾月完成。

畫展開幕後隨即引發網上討論，有網民對其中兩幅作品特別關注，直指熟口熟面。一幅以藍色瞳孔為主題嘅流體畫，被指同某眼藥水牌子嘅包裝相似，網上類似色彩同構圖嘅作品亦唔少。另一幅色彩斑斕嘅枯樹畫作，有網民貼出一段YouTube繪畫教學影片截圖，認為畫中枯樹構圖、背景嘅紫藍色暈染，以及點綴其中嘅星光效果，都同Stephy展出嘅作品相當似。有網民質疑Stephy嘅作品係「致敬」定「抄襲」，留言話「係咪玩找不同之處？」不過亦有支持者相信Stephy唔係抄襲，認為作品係為慈善，唔應該針對佢，仲話畫作本身具美感，感受到獨特性。