孔德賢向倪嘉雯拋橄欖枝組Hyrox小隊 女方耍手擰頭：我會積極考慮. 孔德賢同倪嘉雯昨日（17日）出席新劇《香港探秘地圖》宣傳活動，接受《香港01》訪問時透露二人喺劇中會有長達20集嘅「感情鋪排」，行純純嘅小清新路線，連親密戲都欠奉。倪嘉雯笑話：「好似中學生咁，又唔敢拖手嗰啲。」雖然鏡頭前純情，但拍攝過程都有驚險時刻——農曆七月十四全組人去墳場拍戲，孔德賢話大家都有裝香拜神，講明嚟拍嘢唔好打擾；倪嘉雯就話自己雖然冇宗教信仰，但都會尊重，媽咪仲特登求咗個平安符俾佢。

講到倪嘉雯喺《魔音女團》成功出道，佢話到𠵱家都未接受到多咗一個女團身份，但就好開心好興奮：「我一直專注拍劇同主持，完全冇諗過會無啦啦多咗個女團身份。」佢覺得加入女團係一個好藉口逼自己練好唱歌跳舞，經過三個星期特訓，手腳明顯協調咗，但仲有好大改善空間。

孔德賢近年迷上Hyrox體能大賽，為咗備戰操咗三個月，期間經歷病、公幹、搬屋，體能一度跌至谷底，但學識咗點樣休息。佢話想繼續參加其他地方嘅Hyrox比賽，仲即場向倪嘉雯招手：「我哋而家嘅小隊仲爭一個人，我睇下Carmen願唔願意加入。」倪嘉雯聽完即刻耍手擰頭，話自己雖然有做Gym，但Hyrox要跑8公里又做大量力量訓練，實在「無福消受」。孔德賢唔放棄再邀請，話一定要有人逼佢先得。倪嘉雯最後「戴定頭盔」話：「我會積極考慮一下嘅！我而家唔敢立flag，到時原來唔係我嚟嘅係第二個女仔，我好難落台㗎嘛。」TVB