中年好聲音4｜蔡宓婕唱《光明》悼未出世BB 懷胎6月因胎兒不健康無奈流產.《中年好聲音4》昨晚（17日）播映「人生之歌」下半場，曾勇奪MVP嘅蔡宓婕打頭陣，演唱汪峰名曲《光明》，背後故事令全場爆喊。蔡宓婕擁有一個幸福美滿家庭，有靚仔老公同可愛混血囝囝。佢話揀呢首歌係因為每當低落時就會聽，從中獲得希望：「我哋可以喊，可以吶喊，但係唔可以放棄希望，一定要相信光明就在我哋前方。」

被主持車婉婉問到人生中最想吶喊嘅時刻，蔡宓婕哽咽道出一段痛心往事：佢曾懷孕六個月時，因胎兒健康問題無奈選擇人工流產。「護士同我講，媽媽我依家要打支針，BB就會冇心跳了。佢一路講嘅時候，我BB係一路郁緊嘅，六個月嘅時候已經有胎動了……」肥媽聽到忍唔住轉過身，可嵐、許雲妮同台下觀眾喊成一片。呢段經歷亦引起海兒極大共鳴，佢話好友有相同境遇，相信見到蔡宓婕今日咁開心會受到鼓舞。蔡宓婕揀選「進取之路」，最終得88分落入待定區，但評審紛紛畀暖心支持。谷婭溦話：「我希望你繼續咁樂觀，咁positive。」肥媽話：「小野貓就係一個好positive嘅人，呢個就係唱歌最好、最高嘅境界。」TVB