中年好聲音4｜「東方不敗」尹景順奪MVP 姚兵馬浩宜緣盡18強. 《中年好聲音4》昨晚（17日）播映「人生之歌」下半場。壓軸出場嘅許雲妮來自傳統家庭，為咗唔想被人睇小、欺負，喺人前強裝堅強，將所有委屈收喺心底。佢以「屈機沙聲」深情演繹梅艷芳名曲《女人心》，唱出歷盡滄桑嘅感覺，獲張佳添激讚進步好大，海兒都讚佢收放自如，最終奪得91分，成為「平實之路」最高分參賽者。

節目尾聲，評審喺等待區淘汰兩人，最終馬浩宜同姚兵被foul。喺上半場失準嘅馬浩宜成為第18名，佢強忍淚水多謝老公支持佢嘅「任性」，好開心認識一班戰友一齊追夢。姚兵以雄渾聲線演繹《你不在》，但被批評只懂用力、唔識用氣，周國豐更指佢歌聲似「喃嘸」，結果只奪81分，成為第17名。姚兵離場前多謝樂易玲，話公司幫佢頂住養家，仲話從未見過咁用心對待選手嘅團隊同評審。

「東方不敗」尹景順喺上半場唱閩南歌《阿嬤的話》感動全場，五位評審一致畀佢MVP。景順謙稱冇諗過攞獎，只係想唱好每首歌、唱出心聲。佢好鍾意閩南歌，因為係婆婆同媽媽嘅母語，份外有親切感。