黃洛妍新歌《槍與玫瑰》高燒頂硬上拍MV 收起霸氣展現溫柔一面. 有《聲夢2》「大魔王」之稱嘅黃洛妍（Janees）近日推出全新單曲《槍與玫瑰》，以和平為主題，傳遞溫暖與希望。為配合歌曲，Janees一改以往霸氣強勢嘅形象，展現溫柔而有力量嘅一面。佢笑言：「平時形象嘅霸氣只係我一部份，大家唔好俾我個樣呃咗。我係要保護人嘅時候先會霸氣，其實認識我嘅人都知我平時好溫柔㗎，哈哈！」

拍攝MV當日，Janees抱病上陣，佢話：「我病咗幾日，今日拍攝係最病嘅一日，一路發高燒退唔到，又冇胃口又瞓唔到覺，仲要拍節目。但係唔可以因為我身體抱恙而拖累大家進度，唔可以辜負團隊嘅心機。」佢續說：「我好識得麻醉自己，同自己講『冇病呀，精神！must do！』」新歌MV用一鏡到底方式拍攝，呼應歌詞內容。Janees喺冰冷簡約嘅房間裡如常過生活，但從電視新聞得知世界各地發生嘅事，嗰種感慨、沉重冇形於色，而係藏於心，百感交集。佢話：「拍攝過程其實好感觸，同我每日睇到新聞嘅感受一樣，成日都會問『點解會發生呢？點解今時今日仲未停呢？』」

呢份感觸成為佢嘅靈感，與作曲人及監製譚國政討論創作方向，並由林若寧填詞。Janees感慨：「其實我哋真係好幸運，有安穩嘅生活；身處遠方有好多小朋友流離失所，為咗生存好多嘢冇得揀。雖然未必可以幫到好大忙，但希望喚起大家關注，同時可以將和平、愛傳開去。」TVB