「最美雙兒」陳少霞再婚升呢8億闊太 生活照意外曝光豪宅內貌. 曾喺《鹿鼎記》飾演「雙兒」嘅陳少霞，被譽為「最美雙兒」。佢當年事業得意時閃嫁澳籍華商息影，先後誕下兩女，但最終離婚收場。前夫病逝後，佢獨力照顧兩女，經濟拮据要搬入天水圍公屋居住。不過，苦盡甘來，佢之後與坐擁8億身家嘅富商李文輝再婚，榮升「8億闊太」，年前仲豪擲3千幾萬元，購入大埔名牌屋苑獨立洋房。

現年49歲嘅陳少霞，17歲時被張艾嘉監製電影《哥哥的情人》劇組發掘，出道就同梁朝偉合作，獲提名金像獎最佳新演員。加入TVB後拍攝《笑傲江湖》、《鹿鼎記》等劇集成為一線花旦。2000年下嫁澳籍華商後淡出，離婚後復出拍劇，期間患上甲狀腺疾病，大女有糖尿病，前夫離世後經濟陷入困境。後來喺教會認識有「法拉利之父」之稱、傳擁8億身家嘅李文輝，2016年結婚，婚後安心做幸福少奶奶。2019年誕下愛女Esther，現居無敵大海景獨立屋，有私人花園同小農莊。2023年曾亮相內地真人騷《無限超越班》，再度扮演「雙兒」，凍齡外貌令網民驚嘆。同年以3,200萬元購入大埔康樂園1,628呎洋房。佢間中喺社交平台分享天倫樂照片，曝光豪宅內有私人花園，仲改裝成三塊田俾女兒種植有機農作物。