馬浚偉辭任新城廣播去向揭曉 出任上市公司副主席年薪250萬. 馬浚偉早前突然以私人理由辭去新城廣播行政總裁一職，去向一直未明。正當外界對佢嘅決定感到驚訝之際，衍生集團今日正式公布，馬浚偉將於本月20日獲委任為集團副主席、執行董事及聯席行政總裁，年薪約250萬港元，另加獎金。由管理一般企業躍升至管理上市公司，可謂職場生涯另一個新高點。

馬浚偉在1993年加入演藝界之前，已先後喺出版社及化工公司擔任市場及營銷工作。其後佢喺演藝界工作超過30年，範疇涵蓋歌、影、視、播、編、導、演、監等。中學畢業後直接投身社會嘅佢，一直渴望讀書，直至2018年先重新進修，現時不僅係國際認可咖啡師，仲取得大學學士學位及香港教育大學碩士學位，更曾喺北京大學修讀高級行政管理人員課程。此外，2012年離開TVB後，佢開辦補習學校、咖啡品牌生意及影視製作公司等。

馬浚偉對中醫藥及食療素有濃厚興趣，累積近40年工作經驗，喺各行各業人脈資源豐富，對發展衍生集團業務大有幫助。佢衷心感謝新城廣播嘅諒解並接受請辭，同時感激過去兩年半共事過嘅每一位同事及商業夥伴，對未來業務發展充滿信心，期待開展更大、更強、造福社會嘅新篇章。TVB