【TVB AI劇係微短劇 早有部署建AI團隊？吳家樂爆大台捧新人方程式】
.
TVB串流平台MYTVSUPER就喺社交平台發布宣稱係首套全AI生成偶像短劇《在我心中，你是獨一無二》嘅預告片。網民對呢套AI劇反應麻麻，唔少人認為畫面做得幾假，亦有網民質疑「TVB咁多人等開工，點解用AI？」。
打滾電視圈多年嘅吳家樂同鄧兆尊，喺佢地主持嘅youtube節目《娛樂好好玩》中談及呢套AI劇。吳家樂話佢地所知嘅同樣唔多，只係知道《在我心中，你是獨一無二》將會係以近年內地大熱、分幾鐘一集嘅「微短劇」推出。吳家樂指以幕後人員角度梗係唔想用AI，並且踢爆TVB過去會將視覺效果嘅工作外判，但近年已經建立內部部門專責AI生成影像等發展，曾經製作過選美及節日宣傳片，《在我心中》當然都係呢team人負責製作。
網民話「TVB咁多人等開工，點解用AI？」，主持之一謝遜問AI劇推出後，係咪更難有好似《四葉草》咁由新人擔正嘅機會。吳家樂承認用AI製作嘅新人孭飛，比起真人新人擔正更可行，因為AI演員演技「可以畫出嚟」，但真人演員需要時間浸淫，全新人孭飛的話「邊個冒呢個險？」，一旦失敗結果可能係牽連監製、導演等。吳家樂又指即使有好劇本，又會寧願搵令人有信心嘅資深藝人，因此更唔敢用新人，又或者要「一lung一」，由有一定經驗嘅藝人以舊帶新，喺劇中演新人嘅身邊人﹐一旦新人交唔到貨，剪走戲份就得，並指唔少TVB一線小生花旦當日都係咁樣被提攜出嚟。鄧兆尊就指新人唔一定冇運行，TVB可能會安排新人去處境劇度「操」，有一定水準先放人。
