黃宗澤今日（17/9）現身中環出席時裝發布會。對於好兄弟吳卓羲日前出席活動，提到近日出現賣牛雜的「山寨版吳卓羲」，他指看到後也覺得相似，之後他表示其姨姨有發相問他，究竟這個人是不是他，他一時忘形疑似激動爆粗說：「我都費事睬佢，佢X知唔係我啦！」當記者追問「X知？」吳卓羲立即尷尬笑說：「實知呀！X知！你係唔係好傳媒嚟呀？」引起現場笑聲不斷。
今日黃宗澤接受《香港01》訪問時笑言：「係咪要講粗口㗎？我『實知』嗰個係吳卓羲嚟，同埋嗰個賣牛雜嗰個唔係佢嚟嘅。佢俾我哋笑佢呀。不過講真，男人一句半句粗口幾廿歲人又點會唔講呀，但咁樣漏口講歪咗，咁唔小心就抵佢俾人笑。」
被問到對方是否不小心還是習慣？黃宗澤表示：「我覺得佢係唔小心，如果講開粗口嘅人都知唔個字唔係咁擺法，我覺得廣東話博大精深，嗰啲精髓粗口都係一部分。咁所以我覺得佢係講歪咗少少啫，不過講真男人老狗，一個土生土長嘅香港人，男仔10個（有）9個半都識講粗口啩！只不過講唔講咁解啫。同埋我哋食飯都會講，邊有咁斯文，只不過我哋對住鏡頭就唔可以教壞小朋友啫。」
