蘇丹開波6分鐘就取得領先令大家頗爲意外，亦係佢哋本屆賽事第一粒正式入波（撇除對方烏龍波）。而佢哋上下半場早段嘅兩波進擊都為塞內加爾帶來唔少威脅，但係久守難免會有一失。其餘時間占據優勢嘅大熱門，有柏巴古爾耶（Pape Gueye）梅開二度。而喺佢攻入第二球之前，塞內加爾還有兩次入波但係越位在先被判詐糊。下半場換入嘅17歲小將麥巴耶（效力巴黎聖日門），入替三分鐘後即收穫第個人一粒入波，佢亦都成為進入廿一世紀後非洲國家盃最年輕嘅入球球員。而助攻嘅沙迪奧文尼，就貢獻本場賽事第2個助攻，本屆賽事佢已經累計有3個助攻，位列榜首，同時都係佢喺非洲國家盃歷來嘅第9個助攻。突尼西亞今屆賽事嘅表現並唔太具說服力，今仗可以證明呢一點。開波已進入防守狀態嘅馬里，26分鐘更有右閘禾尤高利巴尼（Woyo Coulibaly）蹬踏對手紅牌被逐。近年FIFA修例對惡意蹬踏動作嘅「把關」相當嚴厲，早前嘅省港盃亦有出現過同樣爭議。踢少個嘅馬里喺下半場尾段失守，走甩咗查奧亞（Firas Chaouat）被佢頂入領先。殊不知讀秒階段突尼西亞後防犯錯禁區內手球輸十二碼，辛拿約高（Lassine Sinayoko）操刀追和令雙方重返同一起跑線。十六強頭兩場有加時，更有埋十二碼睇。馬里龍門迪積古爾迪亞拉（Djigui Diarra）就成為民族英雄，接連撲出艾祖利（Elias Achouri）同朗丹尼（Mohamed Ali Ben Romdhane）嘅主射，馬里八強會斗塞內加爾。🌍⚽️🏆🇲🇦🇸🇳🇲🇱
