上半季打馬刺，下半季打紐約，好多人會認為，蘇燦（Jeremy Sochan）已經穩袋冠軍指環。

究竟係咪公就佢贏，字都係佢贏？假如紐約力搏捧盃，蘇燦當然有份，但馬刺贏嘅話，又係咪一定有指環？

根據以往做法，加上蘇燦同馬刺關係仍然友好，的確有好大可能，不過唔係個個球員都會接受，以蘇燦性格，就算馬刺肯畀，佢都未必會要。之前都有試過球員係咁，就係華利祖（Anderson Varejao）。

2015/16球季，佢本來效力騎士，季中就交易到拓荒者，之後立即被買斷，再加盟勇士。當時好多人都講過同一番話，以為佢穩奪冠軍指環，結果勇士領先3-1下被騎士反勝，而佢最終亦未有接受騎士嘅好意。

蘇燦自信得嚟都幾硬頸，如果紐約力搏落敗，可能會同當年嘅華利組一樣。

文章擇自- 仙道彬手記🏀