「體罰學生」成為今日熱門話題

幾乎整個籃球圈都喺度討論翁金驊涉嫌逼學生自己嘅事件，由將外套丟喺地上，到捉住學生嘅手「自摑」，最後更逼得學生用另一隻手再自摑一巴，發生喺學校操場，簡直是最大嘅侮辱。

漢華中學已發出通告，表示會暫停涉事教練嘅職務，但更希望今次事件，可令更多家長或者係上一代嘅人明白，呢一套教育早經已過時。

有D跟同佢打波嘅朋友，回憶果段要「帶阿爸阿媽一齊練波」嘅日子，還是猶有餘悸；亦有人第一堂就被佢笑又肥又矮，幸好離隊後搵到另一次機會。

教波教到粗口橫飛，將球員形容為廢柴同垃圾，而且佢哋只係中學生，有冇問題？

舊陣時讀書遇到好教練係一種福氣，不過好多人仍然信奉舊時代嘅「嚴師出高徒」標準，開口埋口都話「鬧你打係為你好」、「咁都唔捱得大個點搵食」；有D就認為學生難教，要「棒下出孝子」，人身攻擊，盡情侮辱，都係必須嘅手段。

籃球圈盤根錯結，相當複雜，有D人可以教幾十間學校，亦有D只能默默耕耘。今次事件，希望可令更多人明白，教學相長，都要與時並進，而且教育規例早已寫明，教員不得向學生施行體罰。

問過一位教練，就唔開名嘞，有段說話好值得大家存記。

「好難教，都係要睇吓佢邊種難囉。有唔記得戰術、有啲唔投入、有啲掛住玩、有啲做極都錯，都要搵唔同方法去應對。

最好係避重就輕啦，有啲人係唔得嘅，咪叫佢做其他嘢囉，識得搵到球員嘅長處，都係教練嘅功力。」

//呢兩日對本地（香港）籃球壇來講，絕對係黑日子。先有渣男，再有體罰學生嘅教練，睇過片段嘅人大概都唔需要講疑似兩字，因為一睇就知係前港隊球員翁金驊。最先喺threads發佈嘅人已刪貼，唔知係咩原因，但唔少人已經備份。喺片段見到，翁sir先捉住學生嘅手要佢自摑，之後唔知講咗D咩，學生又再自摑一巴。最令人憤怒係旁邊嘅助教未有出手阻止，其他學生相信亦係敢怒不敢言。

睇波多年，對於翁金驊嘅行徑，早有耳聞；有D難以求證嘅醜聞，不作評論，但單就體罰學生一事，的確由來有之。有D打籃球嘅朋友話，上一代教練大多嚴厲，言下間似係暗示新一代球員抗壓力低，但請教過多位教練同甲組球員，就算係點樣嚴厲嘅名教頭，頂多係口頭責罵，從未聽過動手打人，而好似呢種侮辱性極大嘅「自摑」，發生喺學校操場嘅大庭廣眾下，更係聞所未聞。//

*當事人尋日亦就體罰學生事件公開道歉

文章擇自- 仙道彬手記🏀