Kawhi嘅陰陽合同風波未有定案，但當初贊助快艇嘅公司Aspiration，就提早出事。因為呢間公司嘅創辦人之一辛貝治（Joe Sanberg）因涉及2.48億美元嘅電騙（wire fraud）案件，啱啱被聯邦法院判處14年有期徒刑，據指佢涉嫌造假數，再以誇大公司收入等來獲取資金。

Aspiration成立於2013年，係間以綠色能源、環保放及永續發展為主題嘅公司，呢一類「遠見」就獲得多位影星及名人支持，包括快艇老闆波馬（Steve Ballmer），仲有迪卡比奧、Ironman 羅拔唐尼（Robert Downey Jr.）同奧蘭度邦姆（Orlando Bloom）等人投資。不過畫餅未能充飢，Aspiration近年不斷爆出財務問題，更於去年申請破產保護。

Aspiration喺2022年簽低快艇球星Kawhi作代言人，而美媒之前就指NBA已委託律師樓調查波馬（Steve Ballmer）投資喺Aspiration嘅資金，是否有用作支付Kawhi嘅額外薪金，以規避薪金上限。

早前波馬（Steve Ballmer）已表示自己亦係受害者，合計損失超過6,000萬美元，更強調佢同Kawhi及快艇球隊都未有違反NBA規定，而Kawhi亦斷言否認相關指控。今次辛貝治（Joe Sanberg）淪為階下囚，未知會否因此而爆出更多帳目上的嘅問題，令Kawhi惹上麻煩。

Kawhi與快艇餘下一年合約，下季薪金為5,030萬美元；今季快艇只能殺入附加賽，但不敵勇士提早出局，Kawhi就入選NBA最佳二隊。

文章擇自- 仙道彬手記🏀