無綫新劇《飛常日誌II》於6月15日首播，主要演員有馬國明、高海寧、朱敏瀚、洪永城、劉穎鏇、周嘉洛、郭柏妍、戴祖儀、吳偉豪、徐榮、張馳豪、鍾柔美等。為增加觀眾新鮮感，今次請來兩大靚女港姐加盟空姐系列，分別是2024年港姐冠軍倪樂琳（Ellyn）及2021年港姐亞軍梁凱晴（Carina），分別飾演「地勤雙Ca」Jessica及Erica，並因在劇中有不少對手戲而成為好友。

「地勤雙Ca」連同其他「空姐」，包括有李芷晴（Stephanie）、邢慧敏、曾文心、莊易羚及史穎喬等的亮麗造型今日一次過率先曝光，當中Ellyn的「可愛托腮」及Carina的「甜美酒粒」各有各搶，二人之前將新劇空姐造型上載個人社交網後，均引發不少熱討。Ellyn留言指拍攝時一度被誤當作是真空姐，繼上季劉穎鏇後再度引發「空姐誤會」，Ellyn留言：「可以有機會入到機場禁區 特別激動！可能我同呢套制服嘅適配度太高，導致拍攝嘅時候有好多人真係以為我係員工hahaha，太有意思了！」網民亦大讚Ellyn「靚到人見人愛」：「靚靚空姐」、「你咁靚得唔得架」。至於以「甜美笑容」見稱的Carina，空姐制服加上殷勤空姐甫，以及夠晒賞心悅目的「甜美空姐4格」亦吸獲洗版式好評：「美麗的女神」、「黐線，點解可以咁靚」、「甜美女神」、「如果有這麼靚的空姐，日日都搭飛機」、「Beautiful post！So Elegant」。

除了女演員們鬥靚女，男主演們亦同樣未開劇先「暗戰」，男子組方面，在第二季加入型男制服行列的，是近年在劇集演出愈見活躍的張馳豪（Aska），在劇中飾演由頂流轉行機場保安的車成軒，先天長腿配以機場保安制服相當帥氣，不少網民看到其造型後，均對其角色表示期待。而近日因「終極寵妻」人設掀起連番熱討的馬國明，貫徹其「好好先生」人設，飾演情理兼備的「楊尚偉」；在新一季中晉升至客運大樓及旅客體驗總經理，經常以筆挺西裝Look示人，形象專業，隨即引發熱討，並搞笑獲封「西裝好男人」。另外，自《正義女神》後人氣急升的周嘉洛，這次將由「冷面法官」轉型成「囂張熱血新人王」， 配上一頭與人設「對比感極強」的齊陰頭，極為可愛，相信劇集播出後角色定能成功入屋。而作為第一季「型男擔當」的機長朱敏瀚（朱仔），今集除繼續又Cool又型之餘，還會上演型到爆的「劈炮大行動」， 又會與下屬副機長方可兒（郭柏妍飾）拼發出「互撐互助」的火花。在今日曝光的最新宣傳照，出名大隻仔的朱仔，其中一個「爆肌熟男」打扮盡展穩重型男魅力，值得期待。