陳懿德專訪｜把握每個發光機會 樂做haters自我審判
陳懿德（德德）今年27歲是近年無綫力捧的女藝人之一。
陳懿德（德德）今年27歲是近年無綫力捧的女藝人之一。德德參加《2021年度香港小姐競選》而入行，短短出道四年主持備受肯定，她今年更獲得公司重用獨挑大梁主持《萬千星輝頒獎典禮2024》，兼且獲得「最佳女新人」殊榮。德德接受專訪大談成名背後得來不易的經歷，她擁抱理想把握每一次機會向目標進發。
德德接受專訪大談成名背後得來不易的經歷。（周令知攝）
入行想做明星？
德德大談入行的經歷，她分享自己當初讀香港中文大學新聞及傳理學系，而最初的理想是希望從事幕後的工作，她續指有試過擔任實習小編工作。提到第一份工作內容，德德興奮分享：「我第一個工作就係跟公司入嚟無綫去跟港姐呢一個新聞。我嗰陣時第一次踏入無綫嘅時候，覺得好似一個主題樂園咁樣。我由細已經睇好多唔同無綫嘅劇集，所以呢我一入到嚟，原來《愛·回家之開心速遞》嘅人係真的，因為我仲好記得阿蟹，同埋就係豹哥呢喺度同我打招呼，覺得好神奇呀！記得高中嘅時期，每日我都會睇《愛·回家之開心速遞》去煲飯。」
德德分享讀書時期每日我都會睇《愛·回家之開心速遞》去煲飯。
自揭參加《2021年度香港小姐競選》的原因
被問到參加《2021年度香港小姐競選》原因，德德分享：「有一個朋友就同我講，佢就話不如你去參選港姐，我覺得其實都幾啱你，就算贏定輸咪當攞一個經驗囉！」德德認為人生很短暫，所以更應該把握時間吸取寶貴的經驗，她表示無悔參選港姐：「係我其中一個人生做得最啱嘅一個決定，因為你喺入面係發掘咗唔同一面嘅自己，為我打開咗無限可能嘅大門。」
德德大談參加《2021年度香港小姐競選》點滴。
加入《東張西望》做娛樂主持
德德指加入無綫大家庭後第一份工作是擔任《東張西望》的娛樂主持，她分享：「可以經常去訪問一啲唔同嘅藝人，我覺得呢個工作派咗畀我，我一定要做到最好，我發現做一個娛樂主持都好唔簡單，因為你每一次訪問唔同嘅人，尤其是一啲星嘅時候，你要點樣去拿捏呢！有陣時如果你笑得太大聲可能又會覺得搶咗人哋嘅注意。」提到難忘的採訪經驗訪問，她指是訪問天王郭富城，並表示：「佢每一日都係可能好勤力去練舞，或者對自己嘅飲食係好嚴格嘅，咁我哋呢一啲小角色，仲有咩資格唔努力，或者係盡自己嘅二百分努力去追上佢哋嘅進度呢！咁我就覺得係警惕咗我好多。」
德德指加入無綫大家庭後第一份工作是擔任《東張西望》的娛樂主持。
享受扮醜角滋味願做喜劇主角
德德在節目《福祿壽訓練學院》中扮演黑板和金像獎吸引觀眾的眼球和注意，她表示享受扮醜角滋味：「我係好享受嘅，首先我覺得呢一個機會都係大家畀我。我梗係享受啦！而第二就係呢個都係好我嘅性格。金像獎個妝落咗大過半個鐘，而黑板個落咗成個鐘都落唔到，淨係落得半個妝左右，都仲係成塊面係黑色嘅。我就帶住個半個妝揸車返屋企，嗰陣時係深夜，所以我勁驚嚇到隔離車嗰啲司機，我覺得都係一個好好嘅體驗。」
被問到節目中播出後，對於網民最深刻的留言，她表示：「去做一次喜劇入面嘅主角，其實係網上嘅留言，我就一路記住。我哋《福祿壽訓練學院》入面嘅藝人或者係平時仲係小角色嘅藝人就算未必係一個節目又或者劇集入面嘅主角，但都好希望向住呢個方向帶到歡樂俾大家。」
德德在節目《福祿壽訓練學院》中扮金像獎吸引觀眾的眼球和注意。
勇奪萬千最佳女新人責任變大
德德在《萬千星輝頒獎典禮2024》中擔任大會司儀，同時入圍「最佳女新人」、「飛躍進步女藝員」及「最佳女主持」的提名獲得外界不少關注及肯定。對於獲得「最佳女新人」殊榮，她表示：「本身其實亦都冇預計到自己會攞獎，但我係一個好鍾意做功課嘅人，所以我亦都有做定好少嘅功課。上台得獎前我先至諗定咗少少得獎感受。」她續說為了讓司儀技巧方面有所進步，所以花了頗長時間去看不同國家的頒獎典禮影片。
德德在《萬千星輝頒獎典禮2024》勇奪萬千最佳女新人。
自嘲網絡酸民自我審判
從出道開始德德對於面對網絡的留言，她則自嘲是網絡酸民：「我對自己係一個超級嚴苛嘅人，有陣時大家咪會話網上有酸民嘅，我可能係自己一個嘅酸民，人哋嗰啲留言好攻擊性㗎！但其實我覺得人哋嗰啲一啲都唔攻擊性，因為我已經攻擊咗自己，所以佢哋嘅留言反而係比我更加對自己好啲，所以我就覺得佢哋完全冇攻擊性。」
德德對於面對網絡的留言，她自嘲是網絡酸民。（周令知攝）
主持《2024巴黎奧運重點直擊》連踩15日
談及主持生涯最大挑戰的節目，德德憶述主持《2024巴黎奧運重點直擊》連踩15日：「要呈現一個奧運嘅比賽都唔簡單，我仲好記得有人留言俾我話你開頭講分嗰陣時，陳大明又點，陳小明又點，好似唔係好自然喎！跟住我就之後好留意住，我每一日都返去，就算我自己唔開工，我記得嗰陣時應該要開奧運係17日嘅，我都要開15日嘅。我每一日就算唔係自己開工，我都會返去睇其他人點樣做，或者係每日都會返到嚟現場究竟體育組安排咗啲咩資料呀！」
德德憶述主持《2024巴黎奧運重點直擊》連踩15日。
曾報名參選《聲夢傳奇》
德德分享對於能夠主持《聲夢傳奇》意義非凡，她說：「其實之前我選港姐，之前呢我係有報過一次參選《聲夢傳奇》嘅，但我唔知係因為果陣時我已經報得太遲定係點樣，總之就冇咗面試嘅機會，然後我就講返呢個故事畀監製聽，因為咁啱我哋《聲秀》嘅監製就係《聲夢傳奇》果陣時都有份做嘅，可能就係因為我講過呢一個故事，佢就之後搵咗我做《聲秀》嘅主持，之後可能亦都係因為咁樣有呢一個機會。」
對於未來的目標和計劃，德德直言終極目標開清談節目專訪巨星：「我好想有自己嘅清談節目去訪問唔同嘅巨星，想睇下佢哋生活化啲嘅一面。」
